Бүгін Л. Н. Гумилев атындағы Еуразия ұлттық университеті әскери кафедрасының қабырғасында запастағы сержанттар курсын толық бітіріп шыққан студенттер әскери ант қабылдады. Слтанатты шараға әскери кафедраның басшылығы, профессорлық-оқытушылар құрамы, сонымен қатар студенттердің ата-аналары қатысты.
Сержанттарды дайындау циклін осы жылы бірінші рет 180 студент төмендегі мамандықтар бойынша бітіріп отыр: бөлімше командирі – жауынгерлік машинаның командирі; атқыштар бөлімшесінің командирі; (әскери) барлау бөлімшесінің командирі; (арнайы мақсаттағы) барлау бөлімшесінің командирі.
Әскери ант қабылдау рәсімін ашқан ЕҰУ әскери кафедрасының бастығы, генерал-майор Еділ Оразов болашақ Отан қорғаушыларды осынау маңызды оқиғамен құттықтай отырып, әрдайым әскери антты бұлжытпай орындап, қай салада болмасын абыроймен қызмет етуге шақырды.
Студенттер жеке-жеке әскери ант қабылдап, Қазақстан Республикасы мен өздерінің Конституциялық борыштарына адал болып, нағыз отансүйгіш азамат болуға өз уәделерін берді. Мінбеге шыққан шығып, сөз сөйлеген студенттердің ата-аналары да оларға ақжол тіледі.
Содан соң запастағы сержант бағдарламасы бойынша студенттердің әскери даярлығын аяқтау туралы әскери кафедра бастығының бұйрығы оқылып, оқу барысында ерекше көзге түскен студенттер мен олардың ата-аналарына мақтау грамотасы мен алғыс хаттар табыс етілді. Іс-шараның тағы бір маңызды бөлімінде түлектер салтанатты шерумен өтіп, «Алға қазақ жігіттері» әнін орындады. Салтанатты жиын соңы мерекелік концертке ұласты.
Әскери ант қабылдау рәсімі барысында болашақ сержанттар өздерінің кәсіби өнерлерін паш етіп, жиылған жұрт алдында қарумен және қарусыз қоян-қолтық ұрыс үлгілерін көрсетіп, қошеметке ие болды.
Мәлика Исмағұлова,
ЕҰУ әскери кафедрасының студенті