Ұлттық қор қаржысы есебінен 347 стратегиялық жоба іске асырылады

Келесі жылы отандық экономиканың дамуын ынталандыру мақсатына 1,6 трлн теңге жұмсалады. Алдағы үш жылда Ұлттық қор қаражаты есебінен 347 стратегиялық жобаны іске асыруға 5 трлн теңге бағыттау жоспарланған. Бұл туралы қаржы вице-министрі Абзал Бейсенбекұлы Құрылтайда өткен бюджет таныстырылымында айтты.
Вице-министр: «Мемлекеттің басты мақсаты — пайда табу емес, халық алдындағы әлеуметтік міндеттемелерді орындау және азаматтардың лайықты өмір сүруіне жағдай жасау. Барлық бюджеттік инвестициялық жобалар басымдықтарына қарай іріктелді», — деді.
Алдағы үш жылда Ұлттық қор қаржысы есебінен 347 стратегиялық жобаны іске асыруға 5 трлн теңге көзделген. Оның 4,4 трлн теңгесі төрт негізгі бағытқа – көлік және логистикаға, әлеуметтік салаға, энергетика мен су ресурстарына бағытталады.
«Бұл – елге қажетті жобалар, перинаталдық орталықтар мен өңірлік ауруханалар, жылу және газ желілері, автомобиль жолдары мен су инфрақұрылымдары. Инвестициялардың маңызы инфрақұрылымды дамытумен ғана шектелмейді. Олар тікелей әлеуметтік-экономикалық нәтиже береді» , — деді Абзал Бесенбекұлы.
Осы жобаларды іске асыру нәтижесінде шамамен 31 мың жұмыс орны ашылады. Оның 25 мыңы – тұрақты жұмыс орындары.
Бюджетке шамамен 3,7 трлн теңге салық түсімі түседі деп күтілуде.

JQ-Aqparat

Сурет: gov.kz