Түркістан: Сайрам ауданында «Құқықтық тәртіп» іс-шарасы өтуде

Түркістан облысында «Құқықтық тәртіп» жедел-профилактикалық іс-шарасы өткізілуде. Сайрам ауданының полицейлері республикалық жобаны жүзеге асыруға үлес қосуда. Бұл туралы Түркістан облысы ПД баспасөз қызметі мәлімдеді.

Іс-шараның мақсаты – көшелер мен қоғамдық орындарда құқық бұзушылықтардың алдын алу және жолын кесу, жедел жағдайды тұрақтандыру, заңдылықты, құқықтық тәртіпті және қауіпсіздікті қамтамасыз ету бойынша шаралар қабылдау, ІІО есебінде тұратын адамдарды (бұрын сотталғандар, маскүнемдер, нашақорлар, психикалық науқастар, әкімшілік қадағалау белгіленген, «педофил» және «психикалық мекемелерде есепте тұратын педофилдер») тексеру, кәмелет жасына толмағандармен және соларға қатысты жасалатын құқық бұзушылықтардың алдын алу, автомобиль жолдарында жолаушылар мен жүктерді тасымалдауды жүзеге асыратын жүргізушілер арасында көліктік тәртіпті арттыру.

Тәртіп сақшылары қоғамдағы ұсақ бұзушылықтарға «нөлдік төзімділік» қағидасын ұстана отырып, саяжай алқаптарын, демалыс аймақтарын, құрылыс объектілерін, базарларды, техникалық қызмет көрсету станцияларын, шалғайдағы учаскелерді, қыстаулар мен фермер қожалықтарына жіті тексеру жүргізуде.

Сонымен қатар Сайрам ауданы аумағында «Борышкер» жедел-профилактикалық іс-шарасы өткізілуде. Іс-шараның мақсаты – аудан көлемінде анықталған әкімшілік құқық бұзушылықтар бойынша салынған әкімшілік айыппұлды ерікті түрде және мәжбүрлі түрде өндіру жұмысын жандандыру, борышкерлерге түсіндірме жұмыстарын жүргізу.

Шара барысында жеке сот орындаушыларымен бірлескен жұмыстар атқарып, әкімшілік айыппұлды төлеуден жалтарып жүрген құқық бұзушыларды анықтап, олардан салынған әкімшілік айыппұлдарды толық өндіру жұмыстары жүргізілуде.

Мақпал Махаметқызы
Суреттер Түркістан облысы ПД баспасөз қызметі