Табиғатқа жанашырлық бір күнмен шектелмейді

Мемлекет басшысы Қасым-Жомарт Тоқаевтың бастамасымен ұйымдастырылған «Таза Қазақстан» жалпыұлттық экологиялық акциясы аясында Дүниежүзілік тазалық күніне орай Қазақстанның барлық өңірінде сенбіліктер өтті.
Іс-шараларға «Қазсушар» РМК, бассейндік су инспекциялары, «Қазгидрогеология» ұлттық гидрогеологиялық қызметі және «Су ресурстарының ақпараттық-талдау орталығы» КЕАҚ мамандары қатысты.
Сенбіліктер қорытындысы бойынша өзендер, көлдер, суару каналдары, су қоймалары және басқа да су нысандары мен гидротехникалық құрылыстардың аумақтарынан 465,7 тонна қоқыс жиналды.
Астанада Су ресурстары және ирригация министрлігінің орталық аппараты мен комитеттерінің мамандары көшелерді тазалау және абаттандыру жұмыстарына қатысты.
«Бүгін Президенттің «Таза Қазақстан» бастамасы аясында өткен сенбіліктер су ресурстарына ұқыпты қарау мәдениетін қалыптастыру үшін өте маңызды. Еліміздің су саласының мамандары өз үлгісі арқылы су нысандарын ластанудан қорғаудың маңызын көрсетті. Естеріңізге сала кетейін, «Таза Қазақстан» бастамасы аясында «Мөлдір бұлақ» акциясы бойынша бұлақтарды тазалау және абаттандыру жұмыстары да жүргізіліп жатыр. Бұл бастама азаматтар арасында кең қолдау тауып отыр»,
– деді Су ресурстары және ирригация министрі Нұржан Нұржігітов.

Сурет: су ресурстары және ирригация министрлігінің баспасөз қызметі