СҚО-да 6 жол учаскесін су шайып кетті

Солтүстік Қазақстан облысында еріген қар суы облыстық және аудандық маңызы бар 6 жол учаскесін шайып кетті. Оқиға орнында полицейлер кезекшілік атқарып жатыр. 

СҚО Төтенше жағдайлар департаменті баспасөз қызметінің мәліметінше, Уәлиханов ауданындағы Жасұлан ауылынан 5 км жерде «Ақбұлақ-Жасұлан» аудандық маңызы бар автожолды су шайды. Су басқан учаскенің ұзындығы 7 м, тереңдігі 10-15 см. Қазіргі уақытта автокөліктің барлық түріне шектеу қойылған, Жасұлан-Мортық бағыты бойынша балама жол бар.

Тайынша ауданындағы жергілікті маңызы бар «Краснокиевка-Октябрьское» автожолының 9, 10, 11 шақырымындағы үш учаскені су басты. Тереңдігі небәрі 4 см болғандықтан көлік қатынасы бар, тек жол белгілері қойылды. Елді мекендерге қауіп жоқ.

Уәлиханов ауданындағы Ақтүйесай ауылынан 1 км қашықтықта «Ақтүйесай-Шағырсай» аудандық маңызы бар автожолынан ұзындығы 15 м, тереңдігі 10-15 см болатын су кетті. Қозғалыс автокөліктің барлық түрі үшін қозғалыс шектелгенімен, балама жол бар.

Ақжар ауданындағы облыстық маңызы бар «Қазгородок – Горьковское» автожолының 123 км-де қардың қарқынды еруіне байланысты жол төсемі арқылы су өтті. Су алған учаскенің ұзындығы 200 м, тереңдігі 10-15 см. Көлік құралдарының барлық түрлері үшін қозғалыс шектеулі. Қазіргі уақытта барлық су басқан учаскелерде полиция қызметі кезекшілік атқарып жатыр.