Шаруаларды сенделткен әкімдік

Мәртөк ауданы әкімдігі ветеринарлық-санитарлық сараптам ажасайтын қолда бар жабдықтарды пайдаланбай, шаруаларды облыс орталығына сенделтіп қойған.

Аудан прокурорларының айтуларына қарағанда, мұндай сараптаманы жергілікті зертханада да жасай алады. Үкімет тарапынан жағдай жасалған. Ал онсыз да малдан нанын айырып отырған шаруалар Ақтөбеге қатынау үшін жол, т.б. шығындарын өздері көтеріп келген.
Қадағалау органы қызметкерлерінің араласуынан кейін барып, қымбат құрал-жабдықтар іске қосылып, шаруаларды қабылдай бастапты.
Сонымен бірге, Мәртөк билігі былтыр брюцеллезге шалдыққан жануарлардың шығынын өтеуге асықпағанға ұқсайды. Шаруалар малдарын арнайы цехқа тапсырады, алайда заңмен белгіленген шығынды ала алмай келді.
— Тексере келе, 85 мал иесіне 5 миллион теңгеден астам өтемақы төленді. Оның ішінде 5 шаруа қожалығына 580 мың теңге өтелді. Өз жұмыстарына немқұрайлылықпен қараған лауазымды тұлғалар тәртіптік жауапкершілікке тартылды. Өз кезегінде, Қобда ауданының 48 шаруасына 9,3 миллион теңге төленді, Шалқар ауданында шаруаларға 182 мың теңге қайтарылды, — дейді облыстық прокуратураның бірінші басқармасының басшысы Маратбек Мырзамұратов.

Асқар Ақтілеу

Ақтөбе