Қазақстан- АҚШ: Инвестициялық ынтымақтастықтың басым бағыттары талқыланды

Қазақстан экономикасының өсіп-өркендеуінде АҚШ компанияларының инвестициясы маңызды рөл атқарады. Соңғы 30 жылда бұл елден келген тікелей инвестиция көлемі 62 млрд доллардан асты. Жақында АҚШ-та Премьер-Министрдің орынбасары — Сыртқы істер министрі Мұрат Нұртілеу, СІМ Инвестициялар комитетінің төрағасы Ғабидолла Оспанқұлов және «KAZAKH INVEST» ұлттық компаниясының АҚШ-тағы шетелдік өкілі Марат Бірімжан американ бизнесінің белді өкілдерімен кездесті. «KAZAKH INVEST» ҰК АҚ баспасөз қызметі хабарлағандай, жүздесуде «PepsiCo», «Google», «Mastercard», «Citi», «Visa» және «Mars» сияқты белгілі компаниялармен Қазақстан экономикасының басым салаларына инвестиция тарту арқылы өзара тиімді ынтымақтастықты нығайту жайы талқыланды.

Инвестициялар комитетінің төрағасы Ғабидолла Оспанқұлов «Cove Capital» иесі Пини Альтхауспен де келіссөздер жүргізді. Комитет төрағасы компанияның Қазақстандағы жобаларын дамытуда, оның ішінде сирек кездесетін металдарды өңдеу үшін инфрақұрылым құруда айтарлықтай ілгерілеушілікті атап өтті. Компанияның жобалары жоғары технологиялық өнімнің экспортын арттыруға және Қазақстанның негізгі өнеркәсіптік өңірлерінде жұмыс орындарын құруға бағытталған.

Пини Алтхаус Қазақстанның тау-кен өндіру саласына инвестиция салудың негізгі бағыты ретіндегі стратегиялық маңыздылығын атап өтті. Ол сондай-ақ Cove Capital компаниясының жаңа инвестициялық бастамалар арқылы елдегі қатысуын кеңейту ниеті туралы хабарлады. Қазіргі уақытта компания Шығыс Қазақстан облысында геологиялық барлау жұмыстарын жүргізуде, оның нәтижелері бойынша Cove Capital жоғары технологиялық тау-кен металлургия комбинатын салуды жоспарлап отыр. Өз кезегінде, жоба сирек кездесетін металдарды өңдеудің барлық циклін – байыту мен гидрометаллургиядан бастап, қосылған құны жоғары дайын өнімді шығаруға дейін жабуға мүмкіндік береді.

Сонымен қатар, Ғ. Оспанқұлов «Dorilton Capital» өкілдерімен кездесіп, көмір химиясы саласындағы перспективалы жобаларды, соның ішінде қосылған құны жоғары өнім жасау үшін көмірді қайта өңдеуге арналған озық технологиялар трансфертін талқылады. Экологиялық аспектілерге және қоршаған ортаға әсерді азайтуға ерекше назар аударылды.

Сапар аясында Ғ. Оспанқұлов Каспий саяси орталығы ұйымдастырған және «Байланыстарды нығайту және климаттың өзгеруіне қарсы күрес арқылы Каспий өңірінде тұрақты болашақ құру» тақырыбына арналған 5-ші Каспий бизнес-форумында сөз сөйледі. Комитет төрағасы өз сөзінде Транскаспий халықаралық көлік маршрутының көліктік және логистикалық инфрақұрылымын дамытуға ерекше назар аудара отырып, Каспий өңірінде орнықты және интеграцияланған экономика құрудағы халықаралық ынтымақтастықтың маңыздылығын атап өтті.

Сонымен қатар, Ғ. Оспанқұлов Business Council for International Understanding ұйымдастырған «Бейімделген дақылдар мен топырақтардың пайымы: климаттың қиылысында азық-түлік қауіпсіздігін жақсарту, жердің деградациясы және биоәртүрлілік» конференциясына қатысты. Іс-шара алаңы ірі агроөнеркәсіптік компаниялардың өкілдерін және тұрақты Ауыл шаруашылығы саласындағы жетекші сарапшыларды жинады. Комитет төрағасы астық және басқа да ауыл шаруашылығы өнімдерін өндіру үшін қомақты ресурстарға ие Қазақстанның ауыл шаруашылығы секторындағы ынтымақтастықтың перспективаларын талқылады. Ел инновациялық және экологиялық орнықты технологияларға инвестициялар тартуды жалғастыруда, бұл өнімнің қосылған құнын ұлғайту және Қазақстанның әлемдік нарықтардағы бәсекеге қабілеттілігін арттыру үшін жаңа мүмкіндіктер ашады.

Талап Тілеген