Еуропа мен Түркияның арасы ушыға түсті

Страсбургтегі пленарлық сессияда Еуропалық парламент Түркияның Еуроодаққа кіруі туралы келіссөздерді тоқтатуға арналған қарарды мақұлдады, деп хабарлайды «ҚазАқпарат». Қарар Түркияның Еуроодаққа кіру мәселесін тоқтатуға ұсыныс жасайды. Оның себебі ретінде елдегі сәтсіз мемлекеттік төңкерістен кейінгі түрік билігінің «үйлесімсіз» кертартпалығы айтылған. «Түркия ЕО-ның маңызды серіктестерінің бірі болып табылады», — делінген мәтінде. — «Бірақ серіктестік қатынаста ынтымақтастық орнату екіжақты болуы керек… Түркия бұндай саяси ықтиярлықты танытып отырған жоқ». Түркияда өлім жазасы қайта қалпына келтірілсе, бұл елді ЕО құрамына қабылдау ісі толықтай тоқтатылады деп аталып өтілген. Қарарды қолдап 479 депутат, ал қарсы — 37 депутат дауыс берсе, дауыс беруден — 107 депутат қалыс қалған.

ҚазАқпарат