Алматыда Қазақ ұлттық университеті ғимаратының шатыры опырылды

Алматыда әл-Фараби атындағы ҚазҰУ-дың Өмірбек Жолдасбеков атындағы Студенттер сарайы ғимаратының шатыры құлаған деп хабарлайды jasqazaq.kz.

Алдын ала мәлімет бойынша, оқиға кеше түнде орын алған, зардап шеккендер туралы ақпарат жоқ. Ғимараттың нақты қандай себеппен құлағаны әзірге белгісіз. Бұған дейін нысан техникалық тексеруден өтіп, оны реконструкциялау мәселесі көтерілген.

ҚазҰУ баспасөз қызметінің мәліметінше, ғимараттың құрылысы 1985 жылы басталып, 1998 жылы аяқталған. 30 жылға жуық уақыт ішінде мұнда күрделі жөндеу немесе реконструкция жүргізілмеген. Соның салдарынан құрылымдар мен инженерлік жүйелердің тозуы байқалған.
Университет өкілдері Алматы мен оның маңында 2024 жылғы қаңтарда болған жер сілкіністері де тозған конструкцияларға қосымша әсер етуі мүмкін екенін айтты.
Студенттер сарайы 1620 орынға есептелген, жалпы аумағы – 14 290 шаршы метр. Мұнда бұған дейін ғылыми конференциялар, концерттер, фестивальдер және университеттің ірі мерекелік шаралары өткен.
Оқиғаның нақты себебі анықталуда.