Алматыда инклюзивті кітапханаларды дамыту мәселелері талқыланды

Бүгін Алматыда «Шекарасыз кітапханалар: халықаралық тәжірибе, практикалар және инновациялар» атты халықаралық семинар өтті, деп хабарлайды jasqazaq.kz. «Ақ таяқ» айлығы аясында ұйымдастырылған іс-шараға Қазақстан, Өзбекстан, Тәжікстан, Қырғызстан және Ресей Федерациясының кітапхана саласы мамандары қатысып, ақпаратқа тең қолжетімділікті қамтамасыз ету, инклюзивті орта қалыптастыру және кітапханаларға заманауи технологияларды енгізу мәселелерін талқылады.
Салтанатты жиынның ашылуында Алматы қаласы Орталықтандырылған кітапхана жүйесі директорының м.а. Ляззат Спатаева мен Көзі көрмейтін және нашар көретін азаматтарға арналған республикалық арнайы кітапхана директорының м.а. Жамал Кенжебекова құттықтау сөз сөйледі.
Жиынға ұлттық, арнайы және көпшілік кітапханалардың, жоғары оқу орындары мен ғылыми кітапханалардың өкілдері қатысты. Қатысушылар инклюзивті ақпараттық кеңістікті дамытудың халықаралық тәжірибесін таныстырып, кітапханаларда барлық оқырманға қолайлы жағдай қалыптастыру жолдарын қарастырды.
Семинар барысында Қазақстан Республикасы Ұлттық академиялық кітапханасының инклюзивті қызмет көрсету тәжірибесі, Тәжікстан мен Өзбекстанның ұлттық кітапханаларындағы көзі көрмейтін оқырмандармен жұмыс тәсілдері және Ресейдегі арнайы кітапханалар желісінің даму үрдістері таныстырылды. Сонымен қатар Қырғызстан мен Қазақстан өңірлерінің кітапханалық тәжірибелері талқыланды.
Семинардың маңызды бағыттарының бірі – цифрлық технологиялар мен жасанды интеллектіні кітапхана қызметіне енгізу болды. Қатысушылар заманауи технологиялардың көзі көрмейтін және нашар көретін азаматтардың ақпарат алу мүмкіндіктерін кеңейтудегі рөлін талқылады.
Баяндамаларда инклюзивті білім беруді ақпараттық қамтамасыз ету, кітапханашылардың кәсіби құзыретін дамыту, әлеуметтік және мәдени оңалтудағы кітапханалардың орны, сондай-ақ жоғары оқу орындары мен кітапханалар арасындағы ынтымақтастық мәселелері қамтылды.
Жиында кітапхананың тек кітап сақтайтын және оқырманға ұсынатын мекеме емес, әр адамның білім алуына, дамуына және мәдени өмірге қатысуына мүмкіндік беретін ашық қоғамдық кеңістік екені атап өтілді.

Динара Бүркітбекова