Бүгін — Алғыс айту күні

Бүгін — Алғыс айту күні.

Қазақстан халқы Ассамблеясының құрылған күніне орай бекітілген мереке 2016 жылдан бері тойланып келеді. Алғыс айту күні елімізде тыныштық пен үндестік, өзара ауызбіршілік сақтап, барлық этнос өкілдерін бір-біріне құрмет көрсетуге үндейтін мереке.

Президент Қасым-Жомарт Тоқаев ел-жұртты Алғыс айту күнімен құттықтады:

«Бұл – береке-бірлігімізді бекемдей түсетін мереке. Осы күні еліміздің азаматтары бір-біріне ерекше ілтипат көрсетіп, ризашылығын білдіреді. Сондай-ақ татулық, ынтымақ, достық сынды қастерлі құндылықтар жан-жақты дәріптеледі. Мұның бәрі ұлтты ұйыстырудың ұтымды жолы екені сөзсіз.
Халқымыздың уақыт сынынан өткен жанашырлық, қамқорлық, мейірімділік сияқты асыл қасиеттері, әсіресе қиын-қыстау кездерде айқын көрінеді. Бүгінде мемлекетімізде ауқымды өзгерістер болып, Әділетті Қазақстанды құру жолында нақты қадамдар жасалып жатыр. Осындай сындарлы сәтте елдік мүддені бәрінен биік қойып, ырыс-ынтымағымызды сақтау өте маңызды.

Біз озық ойлы ұлт ретінде көздеген барлық биік мақсаттарға қол жеткізетінімізге кәміл сенемін. Осы орайда тынымсыз тер төгіп, Қазақстанды көркейтуге өз үлесін қосып жүрген азаматтарға алғыс айтамын.
Баршаңызға бақ-береке және мол игілік тілеймін!
Еліміз аман, жұртымыз тыныш болсын!»

JQ-Aqparat