ҰҚК 10 күнде шекарада 645 млн теңгеден астам декларацияланбаған валюта анықтады

11 тамыз, 14:30

Сурет: ҰҚК баспасөз қызметі

ҰҚК Шекара қызметі осы жылдың 1-10 тамызы аралығында өткізу пункттерінде валютаны заңсыз алып шығудың 70 әрекетін анықтады. Жалпы сомасы 645 млн теңгеден астам декларацияланбаған валюта анықталды., деп хабарлайды jasqazaq.kz ҰҚК баспасөз қызметіне сілтеме жасап.

Жекелеген жағдайлардың бірінде Жамбыл облысындағы «Қордай» автомобиль өткізу пунктінде шекаралық бақылау барысында шетел азаматында киімінің астына жасырылған 70 000 АҚШ доллары (32 550 000 теңге баламасында) анықталды.

Көрсетілген фактілер бойынша материалдар процесcуалдық шешім қабылдау үшін құзыретті органға берілді.

ҰҚК Шекара қызметі Қазақстан Республикасының заңнамасында белгіленген сомадан (10 мың АҚШ долларынан аспайтын) жоғары қолма-қол ақша қаражатын республика аумағынан тыс жерге алып шығуға тыйым салынатынын еске салады.