Теңбіл доп додасы басталады

Бүгін түн ауа Мексикадағы әйгілі “Mexico City” стадионында футболдан әлем чемпионатының ашылу рәсімі өтеді.
Танымал өнер жұлдыздары Шакира мен Бурна Бой дүбірлі доданың гимні іспеттес “Dai Dai” әнін орындайды.
Содан кейін А тобындағы алаң иелері мен Оңтүстік Африка Республикасының спортшылары жасыл алаңда күш сынасады. Мексика, АҚШ және Канадада өтетін чемпионат ерекше болғалы тұр. Оған 48 елдің командалары қатысып, жалпы 104 матч өтуі тиіс. Айта кеткен жөн, олардың арасында Мундиалға Азия құрлығынан жолдама алған көршіміз Өзбекстан ұлттық құрамасы да бар.
Ғаламшар жеңімпазы 19 шілдеде “New Jersey” (Нью Йорк) стадионында өтетін финалдық ойында анықталады.
Футбол тек спорт жарысы емес. Ол, сонымен қатар, қыруар қаржы әкелетін қуатты индустрия. Ақпарат құралдары жазғандай, бұл жолғы әлем біріншілігінен ФИФА қоржынына 11 млрд доллар түседі. Айта кетейік, бұған дейін Қатар мемлекетінде өткен додада әлемдік футбол қауымдастығының табысы 7 млрд доллар еді.
Оқырман назарына!
Күллі жанкүйер қауым асыға күткен теңбіл доп тойы, тартысты кездесу туралы шолу мен талдау дүниелерді “Jas Qazaq-тан” оқи аласыздар.

Jas Qazaq

Сурет:  aa.com.tr