Шымкент – цифрландыру бойынша көшбасшы өңірлердің бірі

Мемлекет басшысы Қасым-Жомарт Тоқаев Қазақстан халқына арнаған Жолдауында алдағы үш жыл ішінде елімізді толыққанды цифрлық мемлекетке айналдыру міндетін қойған болатын. Осы мақсатта Президент биылғы жылды Цифрландыру және жасанды интеллект жылы деп жариялап, мемлекеттік органдар мен өңірлерге нақты тапсырмалар жүктеді. Бұл бастама Қазақстанның технологиялық дамуын жеделдетіп қана қоймай, халықтың өмір сүру сапасын арттыруға, мемлекеттік қызметтердің тиімділігін күшейтуге және экономиканың жаңа драйверлерін қалыптастыруға бағытталған.
Президент тапсырмасына сәйкес еліміздің барлық өңірлерінде цифрландыру жұмыстары қарқынды жүргізілуде. Осы бағытта ерекше жетістіктерге қол жеткізіп отырған қалалардың бірі – Шымкент. Соңғы жылдары үшінші мегаполис цифрлық технологияларды енгізу, заманауи инфрақұрылымды дамыту және тұрғындарға қолайлы орта қалыптастыру бағытында жүйелі жұмыстар атқарып келеді.
Шымкент қаласы Өңірлік коммуникациялар қызметінің мәліметінше, мегаполис «Smart City Ranking 2025» рейтингінде үшінші орынға ие болды. Бұл көрсеткіш бойынша Шымкент Астана мен Алматыдан кейінгі үздік үштікке еніп, цифрлық трансформация саласындағы табысты жұмысының нәтижесін көрсетті. Аталған рейтинг қаланың цифрлық жобаларды тиімді іске асырып жатқанын және Smart City бағытында тұрақты даму үрдісін қалыптастырғанын дәлелдейді.
Соңғы жылдары Шымкентте цифрлық технологияларды енгізу қарқыны айтарлықтай өсті. Нәтижесінде Smart City көрсеткіші 82 пайызға жетті. Бұл алдыңғы жылмен салыстырғанда 6 пайызға жоғары көрсеткіш. Мұндай өсім ең алдымен қалалық инфрақұрылымды цифрландыру, қоғамдық қауіпсіздік жүйелерін жетілдіру, бейнебақылау желілерін кеңейту, интеллектуалды көлік жүйелерін дамыту және мемлекеттік қызмет көрсету сапасын арттыру бағытында атқарылған жұмыстардың нәтижесі болып табылады.
Қоғамдық қауіпсіздікті қамтамасыз етуде де цифрлық шешімдердің маңызы артып келеді. Қала көшелерінде орнатылған заманауи бейнебақылау камералары құқық бұзушылықтардың алдын алуға және жедел әрекет етуге мүмкіндік беруде. Сонымен қатар, интеллектуалды көлік жүйелері жол қозғалысын тиімді реттеп, көлік кептелістерін азайтуға ықпал етуде. Мұның барлығы тұрғындардың күнделікті өмірін жеңілдетіп, қаланың жайлылық деңгейін арттыруға бағытталған.
Шымкенттің цифрландыру саласындағы жетістіктері тек Smart City көрсеткіштерімен ғана шектелмейді. «Ашық үкімет» бағыты бойынша да қала айтарлықтай нәтижелерге қол жеткізді. Егер 2024 жылы бұл көрсеткіш 97 пайызды құраса, өткен жылы 100 пайызға жетті. Бұл мемлекеттік органдар жұмысының ашықтығын арттыру, тұрғындармен тиімді кері байланыс орнату және электрондық қызметтердің қолжетімділігін кеңейту бағытында атқарылған жұмыстардың жоғары деңгейде жүзеге асырылып жатқанын көрсетеді.
Цифрлық технологиялар бүгінде қаланың әлеуметтік-экономикалық дамуының негізгі факторына айналып отыр. Электрондық қызметтердің кеңеюі тұрғындардың уақытын үнемдеп, мемлекеттік қызметтерді алу үдерісін жеңілдетті. Сонымен қатар, жаңа технологияларды енгізу арқылы білім беру, денсаулық сақтау, көлік және коммуналдық шаруашылық салаларында да оң өзгерістер байқалуда.
Осы аптада Шымкентте өткен «Digital Qazaqstan 2026» цифрлық форумы да қаланың технологиялық даму жолындағы маңызды қадамдарының бірі болды. Жасанды интеллект және цифрлық даму министрлігі, Шымкент қаласының әкімдігі және «Astana Hub» халықаралық инновациялық кластері ұйымдастырған форумға сала мамандары, сарапшылар, кәсіпкерлер мен мемлекеттік қызметкерлер қатысты.
Форум барысында жасанды интеллект технологияларының мүмкіндіктері, цифрландырудың жаңа бағыттары, робот техникасын дамыту және адамның интеллектуалдық әлеуетін технологиямен үйлестіру мәселелері кеңінен талқыланды. Бұл жиын жаңа идеялар мен инновациялық жобаларды дамытуға серпін беріп, өңірлердегі цифрлық экожүйені жетілдіруге бағытталған маңызды алаңға айналды.
Шымкенттің мұндай ауқымды іс-шараны өткізуі кездейсоқ емес. Қала бүгінде еліміздің ірі индустриялық, экономикалық және технологиялық орталықтарының бірі ретінде қалыптасып келеді. Биыл халықаралық «Digital Almaty» алаңының жаңа форматқа көшуі де өңірлердің рөлін күшейтуге бағытталған мемлекеттік саясаттың айқын көрінісі. Ендігі кезекте басты назар жасанды интеллектіні нақты секторға енгізуге, өңірлердің технологиялық әлеуетін арттыруға және тұрақты цифрлық экожүйе қалыптастыруға аударылмақ.
Жалпы алғанда, Шымкент қаласы цифрландыру мен инновацияларды дамытуда еліміздегі көшбасшы өңірлердің біріне айналып отыр. Заманауи технологияларды тиімді пайдалану арқылы қала тұрғындары үшін қолайлы орта қалыптастыру, мемлекеттік қызметтердің сапасын арттыру және экономиканың бәсекеге қабілеттілігін күшейту бағытындағы жұмыстар алдағы уақытта да жалғасын табады. Бұл өз кезегінде Шымкенттің Қазақстанның цифрлық болашағын қалыптастырудағы маңызды орталықтардың бірі ретіндегі мәртебесін одан әрі нығайта түсетіні сөзсіз.
Талап Тілеген

Сурет: Шымкент қаласы Өңірлік коммуникациялар қызметі