Республикалық бюджет кірісі 24,6 пайызға өсті

Бірінші жартыжылдықтың қорытындысы бойынша республикалық бюджеттің кіріс бөлігі толық көлемде атқарылды, ал мемлекеттің барлық әлеуметтік міндеттемелері уақтылы қаржыландырылды, деп хабарлайды jasqazaq.kz. Бұл туралы Үкімет отырысында қаржы вице-министрі Ержан Біржанов баяндады.

Оның айтуынша, трансферттерді есепке алмағанда, республикалық бюджет кірісі 8,5 трлн теңгені немесе жоспарға 100,6%-ды құрады. Өткен жылдың осындай кезеңімен салыстырғанда кірістер 1,7 трлн теңгеге немесе 24,6%-ға өсті. Салық түсімдері 8,3 трлн теңгені немесе жоспарға 100,3%-ды құрады. Өткен жылдың бірінші жартыжылдығымен салыстырғанда салық түсімдер 29%-ға өсті немесе 1,9 трлн теңгеден астамды құрады.
«Кірістер серпініне негізгі экспорттық тауарлар бойынша бағаның өсуі, сондай-ақ сыртқы сауда белсенділігі оң әсер етті. Бұдан бөлек, электрондық жүйесі бойынша сату айналымдары 12%-ға немесе 10,8 трлн теңгеге өсті», — деді Ержан Біржанов.

JQ-Aqparat

Сурет: ашық дереккөз