Полиция Астанадағы мешіттен телефон ұрлаған адамды ұстады

Бүгін, 14:48

Астанада полицейлер қаладағы мешіттердің бірінде жасалған ұялы телефон ұрлығын жедел түрде ашты, деп хабарлайды jasqazaq.kz.

Таңертең ерте ер адам таңғы намазға келген. Намазын оқып болған соң, демалуды ұйғарып, ұялы телефонын қасына қойып, қуаттауға қосқан. Осы сәтті басқа бір келуші пайдаланған. Ол ешкімнің өз әрекетін байқамайтынына көз жеткізіп, қараусыз қалған телефонды жасырын түрде ұрлап, оқиға орнынан қашып кеткен.

Жедел-іздестіру іс-шаралары нәтижесінде полиция қызметкерлері сол күні бейнебақылау камераларының жазбалары арқылы күдіктінің жеке басын анықтап, оны ұстады. Ол 25 жастағы ер адам болып шықты. Ұрланған телефон тәркіленіп, заңды иесіне қайтарылды.

Аталған факті бойынша қылмыстық іс қозғалып, сотқа дейінгі тергеу жүргізілуде.

Полиция азаматтарды өз мүлкінің сақталуына мұқият болуға және қоғамдық орындарда бағалы заттарын қараусыз қалдырмауға шақырады. Егер сіз қылмыстың куәгері болсаңыз немесе құқыққа қайшы әрекеттерден зардап шексеңіз, дереу 102 нөміріне хабарласуыңызды сұрайды.