«Өрт-2026»: Орман-дала өртін сөндіру тактикасы пысықталды

Шымкент қаласындағы «Жасыл белдеу» коммуналдық мемлекеттік мекемесіне қарасты орман шаруашылығы аумағында «Өрт-2026» республикалық командалық-штабтық оқу-жаттығуы ұйымдастырылып, орман-дала өрттерінің алдын алу және оларды сөндіру бойынша күштік құрылымдардың дайындығы жан-жақты пысықталды. Аталған іс-шара табиғи өрттердің жиілейтін кезеңінде азаматтық қорғау жүйесінің әзірлігін арттыруға бағытталған маңызды республикалық деңгейдегі оқу-жаттығулардың бірі болып саналады.

Қазақстан Республикасы аумағында 2026 жылғы 28-29 мамыр күндері барлық өңірлерде «Өрт-2026» республикалық командалық-штабтық оқу-жаттығуын өткізу жоспарланған. Бұл ауқымды шараның басты мақсаты – азаматтық қорғаудың аумақтық басқару органдарының, төтенше жағдайлар қызметтерінің, орман шаруашылықтарының және өзге де мүдделі мекемелердің табиғи өрттер туындаған жағдайда үйлесімді әрі жедел әрекет ету қабілетін арттыру. Сонымен қатар, төтенше жағдайлар кезінде күштер мен құралдарды тиімді басқару, ақпарат алмасу жүйесін жетілдіру және халықтың қауіпсіздігін қамтамасыз ету мәселелері де назардан тыс қалған жоқ.

Республика көлемінде өткізілген іс-шара аясында Шымкент қаласында екі күн бойы өрт қауіпті кезеңге дайындықты күшейтуге бағытталған кешенді профилактикалық және ұйымдастырушылық жұмыстар жүргізілді. Бұл жұмыстар табиғи өрттердің туындау қаупін азайтуға, сондай-ақ төтенше жағдай орын алған жағдайда әрекет ету алгоритмін нақтылауға мүмкіндік берді.

Шымкент қаласында өткен негізгі практикалық кезең Төтенше жағдайлар департаменті бастығының міндетін уақытша атқарушы, азаматтық қорғау полковнигі Т.Мәдиевтің жетекшілігімен ұйымдастырылды. Өрт-тактикалық оқу-жаттығу «Жасыл белдеу» мекемесіне қарасты «Қайнар бұлақ» орман шаруашылығы аумағында өткізілді. Шара барысында орман-дала өрттері кезінде орман шаруашылықтары мен азаматтық қорғау қызметтерінің өзара іс-қимылы іс жүзінде тексеріліп, төтенше жағдайларға ден қоюдың тиімді тетіктері пысықталды.

Оқу-жаттығу аясында азаматтық қорғау қызметтерінің күштері мен құралдарының саптық байқауы ұйымдастырылды. Қатысушылардың материалдық-техникалық жарақтандырылуы, арнайы техникалардың дайындығы және жеке құрамның кәсіби машығы бағаланды. Мамандардың айтуынша, жаз мезгілінде ауа температурасының жоғарылауы, құрғақ шөптердің көбеюі және қатты желдің соғуы табиғи өрттердің тез таралуына себеп болады. Сондықтан мұндай оқу-жаттығулар нақты қауіп-қатерлердің алдын алуға және жауапты қызметтердің кәсіби деңгейін арттыруға үлкен мүмкіндік береді.

Жаттығу сценарийіне сәйкес, қатты желдің салдарынан орман шаруашылығына жақын аумақта орналасқан жоғары қуатты электр желілерінің сымдары үзіліп, соның нәтижесінде құрғақ өсімдіктер тұтанып, өрт шыққан. Шартты төтенше жағдай туралы хабарлама түскен бойда оқиға орнына жедел түрде өрт сөндіру бөлімшелері, құтқарушылар, медицина қызметкерлері, полиция және басқа да азаматтық қорғау құрылымдары жұмылдырылды. Қауіпсіздік талаптарына сәйкес, өрт ошағына жақын аумақтағы тұрғындарды эвакуациялау шаралары да ұйымдастырылды.

Жаттығу барысында жедел штабтың жұмысы жолға қойылып, күштер мен құралдарды басқару, ақпарат алмасу және қауіпті аймақтарды бақылау жұмыстары жүзеге асырылды. Азаматтық қорғау қызметтерінің үйлесімді және кәсіби әрекеттерінің арқасында шартты өрт қысқа мерзім ішінде оқшауланып, толықтай сөндірілді. Сонымен қатар, зардап шеккендерге алғашқы медициналық көмек көрсету және тұрғындарды қауіпсіз аймақтарға көшіру алгоритмдері де тәжірибе жүзінде орындалды.

Іс-шара қорытындысында өрт қауіпті кезеңге дайындық мәселелері бойынша арнайы тыңдалым өткізіліп, жауапты мекемелердің атқарған жұмыстары сараланды. Қатысушылардың әрекеттері талданып, анықталған кемшіліктер мен оларды жою жолдары қарастырылды. Мұндай тәжірибелік іс-шаралар табиғи сипаттағы төтенше жағдайларға қарсы іс-қимыл жүйесін жетілдіруге және халықтың қауіпсіздігін қамтамасыз етуге ықпал етеді.

Оқу-жаттығуға азаматтық қорғау қызметтерінен жалпы саны 134 маман мен 37 бірлік арнайы техника қатысты. Шара барысында шартты төтенше жағдайларға байланысты жедел ақпараттарды қабылдау, күштерді қажетті бағыттарға жіберу, эвакуациялық және профилактикалық іс-шараларды үйлестіру, сондай-ақ түрлі қызметтердің өзара іс-қимылын ұйымдастыру мәселелері толық көлемде пысықталды. Нәтижесінде, қатысушы құрылымдардың табиғи өрттерге қарсы әрекет ету дайындығы жоғары деңгейде екендігі көрсетіліп, өрт қауіпті кезеңге әзірлік жұмыстарының маңыздылығы тағы бір мәрте дәлелденді.

JQ-Aqparat

Сурет: Шымкент қаласы әкімінің баспасөз қызметі