Мемлекеттік рәміздер күні қарсаңында Алматы облысының әкімі Марат Сұлтанғазиев Қонаев қаласындағы Бердібек Соқпақбаев атындағы саябақта балалармен кездесті.
Еркін форматта өткен кездесуге 35-ке жуық бала қатысты. Ашық аспан астында ұйымдастырылған жүздесу барысында оқушылар облыс әкіміне өздерін қызықтырған сұрақтарын қойып, Қазақстанның мемлекеттік рәміздерінің тарихы мен маңызы туралы пікір алмасты.
Кездесу барысында Марат Сұлтанғазиев балаларға Мемлекеттік Ту, Елтаңба және Әнұранның тәуелсіз Қазақстанның басты нышандары екенін айтып, оларды құрметтеу әр азаматтың парызы екенін атап өтті.
Сондай-ақ әкім мемлекеттік рәміздерге қатысты қызықты деректермен бөлісті. Әсіресе, көк Тудың ғарыш кеңістігіне көтеріліп, әлемнің ең биік шыңдарында желбірегені туралы айтылған мәліметтер балалардың ерекше қызығушылығын тудырды.
Шара барысында балалар мемлекеттік рәміздердің авторлары, олардың мән-мағынасы және Қазақстанның халықаралық деңгейдегі жетістіктері туралы сұрақтар қойды. Кездесу ашық диалог форматында өтіп, жас қатысушылар өз ойларын еркін жеткізуге мүмкіндік алды.
Облыс әкімі мұндай кездесулердің жас ұрпақтың бойында патриоттық құндылықтарды қалыптастыруда маңызды рөл атқаратынын атап өтті.
“Мемлекеттік рәміздер – біздің тәуелсіздігіміздің, бірлігіміздің және елдігіміздің белгісі. Оларды құрметтеу – туған елге деген құрметтің көрінісі”, – деді Марат Сұлтанғазиев.
Айта кетейік, Мемлекеттік рәміздер күні жыл сайын 4 маусымда аталып өтіледі. Бұл күн қазақстандықтардың елдік құндылықтарға деген құрметін арттыруға және өскелең ұрпақтың патриоттық тәрбиесін нығайтуға бағытталған түрлі іс-шаралармен ерекшеленеді.
Посмотреть эту публикацию в Instagram
WhatsApp: +7 705 717 9113
