Қазақстан Emirates SkyCargo үшін Орталық Азиядағы алғашқы бағытқа айналды

Алматы әуежайына Emirates SkyCargo компаниясының алғашқы жүк рейсі келіп қонды. Осылайша Қазақстан Emirates SkyCargo үшін Орталық Азиядағы алғашқы бағытқа айналды. Бұл туралы Қазақстан Республикасы Президентінің кеңесшісі Асель Жанасова мәлімдеді.

Оның айтуынша, жаңа апталық бағыт 100 тоннадан астам жүк сыйымдылығын қамтамасыз етіп, қазақстандық экспорттаушылар мен халықаралық сауда үшін қосымша мүмкіндіктер ашады. Сонымен қатар, бұл жоба Қазақстан мен әлемдегі ірі логистикалық хабтардың бірі саналатын Дубай арасындағы көлік-логистикалық байланысты жаңа деңгейге көтереді.

Асель Жанасова Біріккен Араб Әмірліктеріне жұмыс сапары аясында Emirates әуе компаниясының басшылығымен кездесу өткізгенін атап өтті. Тараптар авиация, жүк тасымалы және көлік-логистикалық байланыстарды дамыту салаларындағы ынтымақтастықты одан әрі кеңейту мәселелерін талқылады.

«Бізге көрсетілген сенім мен сындарлы әріптестік үшін әріптестерімізге алғыс білдіремін. Бірлескен жұмыс Қазақстан мен БАӘ арасындағы көлік-логистикалық байланыстарды одан әрі нығайтуға ықпал етеді деп сенемін», – деді Асель Жанасова.

JQ-Aqparat