Ерлан Қарин: Көпшілік алдында адамдарды алалау, өз пікірін қасақана тықпалау әдептілікке жатпайды (Видео)

04 тамыз, 13:54

Президент Әкімшілігі басшысының бірінші орынбасары Ерлан Қарин ұлттық болмыс пен елдік ұстанымдарға қайшы келетін әрекеттерге қоғам болып тосқауыл қою қажет деп санайды. Бұл туралы ол әлеуметтік желідегі парақшасында былай деп жазды:

«Тойда тілекке шығып, ерсі уағыз айтып кеткен ер адамның видеосын желіден көріп қалдым. Шын мәнінде, оның әйелдерді кемсітуі, әншілерге, музыка өнеріне қатысты теріс пікір білдіруі болмысымызға мүлдем жат. Ұлттық таным-түсінікке сәйкес келмейді. Өйткені, Қазақстан – зайырлы мемлекет. Біздің темірқазығымыз – Конституция. Бірінші орында діни шектеулер емес, еліміздің заңдары тұрады.

Сол секілді, өнер мен мәдениетті дінге қарсы қою да – асыра сілтеушілік. Мемлекетіміз таңдаған жол бұл емес. Керісінше, еліміз білім мен ғылымға, өнер мен мәдениетке басымдық беріп келеді.

Көпшілік алдында адамдарды бұлайша алалау, өз пікірін қасақана тықпалау әдептілікке жатпайды. Біз өзара құрмет пен мәдениетті биік қоямыз. Еліміздің жаңа қоғамдық этиканы қалыптастыруға ерекше мән беріп отырғаны да сондықтан.

Сол себепті, ұлттық болмыс пен елдік ұстанымдарға қайшы келетін мұндай әрекеттерге қоғам болып тосқауыл қоюымыз қажет».

Еске салсақ, әнші Роза Әлқожа әлеуметтік желіде Жетісайда өткен тойда айтылған даулы уағыздың видеосын жариялады. Кадрда сөз сөйлеген егде адам тойларда музыканы алып тастап, әйелдер мен ерлерді бөлек отырғызуды ұсынып, әншілерді «шайтанның азаншысы» деп атаған.