Әуе рейстеріне ҚҚС алып тасталса, ұшақ билеті арзандай ма?

Елімізде тұрақты әуе рейстері үшін қосылған құн салығын (ҚҚС) алып тастау ұсынылды. Бұл туралы Үкімет отырысында көлік министрі Нұрлан Сауранбаев мәлімдеді.

Нұрлан Сауранбаевтың мәліметінше, 2026 жылы әлеуметтік маңызы бар 24 әуе бағытын қолдауға 6,4 млрд теңге қарастырылған. Сонымен қатар туристік бағыттарды дамыту өңірлік рейстердің көбеюіне және ішкі туризмнің дамуына оң әсер етеді деп күтілуде.
Министр ішкі әуе тасымалын дамыту мақсатында заңнамаға бірқатар өзгерістер енгізу ұсынылып отырғанын атап өтті. Соның бірі – жергілікті атқарушы органдарға облысаралық әуе рейстерін өз қаражаты есебінен субсидиялауға рұқсат беру. Бұл өңірлер арасындағы әуе қатынасын кеңейтіп, жаңа бағыттардың ашылуына мүмкіндік береді.

Сондай-ақ тұрақты әуе рейстері үшін ҚҚС-ты алып тастау бастамасы әуе билеттерінің бағасын төмендетуге ықпал етуі мүмкін. Сарапшылардың пікірінше, мұндай шаралар ішкі әуе тасымалының қолжетімділігін арттырып, жолаушылар ағынын көбейтуге сеп болады.

JQ-Aqparat