Алматыда ер адам болашақ жарының ағасын пышақтап кетті

02 шiлде, 11:57

Үйлену тойының қамымен аяқталуы тиіс болған отбасылық жанжал пышақ жарақатымен аяқталды. Алматы қаласының Бостандық ауданындағы сауда үйлерінің бірінің автотұрағында ер адам мен болашақ жұбайының туған ағасы арасында жанжал туындаған. Тергеу нұсқасына сәйкес, жанжал барысында күдікті қарсыласына пышақпен дене жарақатын салған, деп хабарлайды jasqazaq.kz Алматы ПД баспасөз қызметіне сілтеме жасап.

Күдікті полиция қызметкерлері тарапынан «ізін суытпай» жедел ұсталды. Қылмыс құралы оның автокөлігінің салонынан табылып, тәркіленді. Айғақты заттар қылмыстық іс материалдарына тіркелді.

Жарақат алған азамат ауруханаға жеткізілді. Қазіргі уақытта оқиғаның барлық мән-жайын анықтауға бағытталған сотқа дейінгі тергеп-тексеру жүргізілуде. Қажетті сот сараптамалары тағайындалды. Жанжалға қатысушылардың әрқайсының әрекетіне құқықтық баға тергеу нәтижесі бойынша беріледі.