Әл-Фарабидегі жол апаты: қаза тапқан үшінші қыздың отбасы сотталушыны кешірді

Алматыда үш жас адамның өмірін қиған Әл-Фараби даңғылындағы жантүршігерлік жол апатына қатысты сот процесі жалғасуда. 8 маусымда сотта 2005 жылы туған үшінші марқұм қыздың отбасы сөз сөйледі, деп хабарлайды jasqazaq.kz Tengrinews-ке сілтеме жасап.

«21 наурыз күні таңғы сағат 9-да маған қайғылы оқиға туралы хабарлады. Осыдан кейін мәйітханаға барып, қызымды таныдым. Мен оның туған анасымын. Қазіргі уақытта ешқандай талабым жоқ. Барлығы заң аясында, соттың шешімімен болсын», – деді ол.

Сондай-ақ анасы бұл туралы өтінішті өз қолымен жазғанын айтты.

«Ешқандай шағымым жоқ. Сотталушыға да, басқа ешкімге де», – деді ол.

Бұдан бөлек, сот отырысында жазбаша өтініш оқылды.

«Жол-көлік оқиғасының ауыр салдарына және қызымның қазасына қарамастан, мен және жақын туыстарым А.П.-ты кешіреміз және онымен толық татуластық. Сотталушы өз кінәсін толық мойындап, шын жүректен өкінді, кешірім сұрады, келтірілген материалдық шығын мен моральдық зиянды толық өтеді. Қазіргі уақытта менің де, туыстарымның да А.П-ке қатысты материалдық немесе моральдық талаптары жоқ және болашақта да болмайды. Татуласу ерікті түрде жүзеге асты, оның құқықтық салдары бізге түсіндірілді. Бұл шешім саналы түрде қабылданды», – делінген өтініште.

Сурет: zakon.kz