Eco Life фестивалі — табиғатқа жанашырлық

«Таза Қазақстан» республикалық акциясы аясында Қызылордадағы келешек мектептерінде ECO LIFE экофестивалі ұйымдастырылып, мектеп аумағын көгалдандыру мен тазалық жұмыстарын қамтыған ауқымды шаралар өтіп жатыр. Табиғатқа жанашырлықты насихаттаған бұл игі бастама жас ұрпақтың экологиялық мәдениетін қалыптастыруға, қоршаған ортаға деген жауапкершілігін арттыруға бағытталды.
Фестиваль барысында мектеп ауласы жаңа кейіпке еніп, жасыл желекпен толықты. Атап айтқанда, 400 түп терек пен үйеңкі, 250 сыр ағашы және түрлі әсем гүл көшеттері отырғызылып, білім ордасының келбеті айтарлықтай көркейе түсті.
Шараға оқушылармен қатар ата-аналар мен ұстаздар белсене қатысып, бірлесе еңбек етудің үлгісін көрсетті. Ортақ іске жұмылған қауым тазалықтың маңызын іс жүзінде дәлелдеп, туған жердің табиғатына жанашырлықпен қарау әр азаматтың парызы екенін ұғындырды.
Экофестиваль тек сенбілік шеңберінде қалып қоймай, тәрбиелік мәні зор мазмұнды шараға айналды. Ол жас буынның табиғатты қорғауға деген көзқарасын қалыптастырып қана қоймай, қоғамда экологиялық мәдениетті нығайтуға өз үлесін қосты.