Полиция Атырау облысындағы 9 жастағы қыздан «жын шығарған» видеоны тексеріп жатыр

Полиция Атырау облысындағы 9 жастағы қыздан «жын шығарған» видеоны тексеріп жатыр, — деп хабарлайды jasqazaq.kz.

Бала құқықтары жөніндегі уәкіл Динара Закиева әлеуметтік желіде емшінің тұрып жатқан жері алдын-ала анықталды деп жазды.

«Аталмыш іс бойынша ІІМ, өңірлік уәкілдермен жұмыс істеп жатырмыз. Емшінің жеке басы мен баланың тұрып жатқан жері алдын-ала анықталды. Ақпарат тексеріліп, мән-жәй анықталуда», — деп айтты Д.Закиева.

Кейқуат Оспановтың жынды шығарып жатқан бейнежазбасы әлеуметтік желіге тарап кетті. Баланы жерге жатқызып, тырп еткізбей ұстап отырған екеудің бірі сұрақ жаудырады. Сөйтіп қыз баланың ішіне бір емес, тоғыз жынның кіріп кеткенін анықтайды-мыс.

Кеше біздің редакция осыдан кейін мәселенің майшаммен қаралатыны туралы жазғанбыз. Дегенмен мұндай ем-домға заң жүзінде тыйым салу жағын ойластырған дұрыс шығар?