Қытай пандемияға байланысты саясатын өзгертті. Ал шекарада ұзын-сонар кезек. Сенат төрағасы Мәулен Әшімбаев 2023-2027 жылдарға арналған республикалық бюджетті нақтылаған отырыста осылай деді.
«Инфляция қысымын бәсеңдетудің бір факторы — Қазақстан-Қытай шекарасындағы логистика. Бізге Қытайдан көп көлемде тауар келеді. Шекарада кептеліс болса, кезек үлкейеді. Делдалдар, ақша жинайтындар көбейеді, жемқорлық артады. Ондай «алымдар» елдегі тұтынушының қалтасына салмақ түсіреді. Шекарадағы ахуалды тазарту арқылы, тосқауылдар мен делдалдарды, қандай да бір жемқорлық схемаларды жоя отырып, бағаны төмендетуге ықпал етеміз», — деді ол.
Мәулен Әшісбаевтың айтуынша, кейінгі кезде кәсіпкерлерден шағым жиі түседі.
«Шекарада жүк көліктері көп тұрып қалады. Қытай режимді либералдандырып, жеңілдеткеніне қарамастан, проблема сол күйі қалып отыр. Мемлекет басшысының осы бағыттағы тапсырмасын орындайтын уақыт келді. Сенаторлар да бұл іспен белсенді айналысуға дайын. Бұл жерде осыған мүдделі тұлғалар, жемқорлар аз емес сияқты. Шекарадағы бүкіл процестерді цифрландырып, автоматтандыру керек. Қытай жағы оған қарсы деп ойламаймын. Олар мұндай бастаманы толық қолдайды. Кеден және өзге құрылымдар тарапынан жасанды жолмен қойылып отырған тосқауылдарды алып тастау қажет. Менің ойымша, Қытаймен шекарадағы жағдай — елдегі бағаға тікелей әсер ететін маңызды факторлардың бірі. Біз мұны жоя аламыз деп ойлаймын. Ол фактор көп жағдайда қолдан жасалған. Пандемия аяқталуға жақын. Қытай өз саясатын өзгертті. Ал шекарадағы кезек әлі сол қалпы. Бұл, әрине, көп сауал туындатады. Үкімет бұл мәселемен мықтап айналысады деп ойлаймын. Сенат депутаттары да оны бақылауда ұстайды», — деді Сенат төрағасы.
JQ-Aqparat
WhatsApp: +7 705 717 9113
