Жылуды қай қалада қашан қосады?

Бүгін ОҚК алаңында өткен баспасөз конференциясында энергетика вице-министрі Сұңғат Есімхановқа: «Ауа райына байланысты жылуды мерзімінен бұрын қосуға бола ма?» деген сауал қойылды. Вице-министрдің айтуынша, арнайы ережеге сәйкес, орташа тәуліктік температура +8 градустан төмен болуы тиіс.

«Жергілікті атқарушы органдар осы ережелерді ұстанады. Бірақ бұл ұсыныс қана. Әрбір жергілікті атқарушы орган жылыту кезеңін ертерек бастауға құқылы. Мысалы, Павлодарда әлеуметтік нысандарда бір апта бұрын жылу беріле бастады. Қазіргі кезде басқа қалаларда да шешімдер қабылдануда», — деді.
Осы +8 деген ереже туралы жылда айтылады, бірақ тәулік бойы осындай температура болуы керек пе, ол жағын ешкім түсіндірмейді.
Мәселен, қыркүйек басталғалы Алматы мен Астанада күн салқындап кетті. Оңтүстік астанада күндіз 20 градус жылы, түнде 8-10 градус. Бірақ әзірге шыдауға болады. Ал Астанада күндіз 15-17, түнде -2 градус. Демек +8 деген ережеге түнде ғана сәйкес келеді. Сонда қай температура есепке алынады?

Наргүл Мырзахмет