Жексенбі күні еліміздің бірқатар өңірінде жел соғып, бұрқасын болады

Атмосфералық ағындардың өтуіне байланысты Қазақстанның басым бөлігінде қар жауып, бұрқасын болады, тек батыста және солтүстік-батыста ауа райы жауын-шашынсыз. Кей жерлерде тұман түсіп, көктайғақ болып, желдің күшеюі болжанады, деп хабарлайды Baq.kz ақпарат агенттігі.

Алматы облысының кей жерлерінде тұман түседі, көктайғақ, Жалаңашкөл ауданында желдің жылдамдығы 24-29 м/с жетеді.

Жамбыл, Оңтүстік Қазақстан облыстарының кей жерлерінде тұман түсіп, көктайғақ болып, бұрқасын соғады және желдің жылдамдығы 15-20 м/с күшейеді. Жамбыл облысында түнде желдің екпіні 23 м/с-қа дейін жетеді.

Батыс Қазақстан облысының кей жерлерінде көктайғақ болып, күндіз жаяу бұрқасын соғып, жел 17-22 м/с күшейеді.

Күндіз Атырау облысының кей жерлерінде желдің жылдамдығы 15-20 м/с жетеді.

Қызылорда, Ақтөбе, Қостанай, Солтүстік Қазақстан, Павлодар, Шығыс Қазақстан, Қарағанды облыстарында тұман түсуі ықтимал, Қарағанды облысында жаяу бұрқасын соғады.