Украина мен Молдова азаматтарынан құралған трансұлттық қылмыстық топ сотталды (Видео)

22 қазан 2024, 12:47

Ақмола облысының мамандандырылған сотының үкімімен Ерейментау қаласының шетіндегі жеке үйде есірткі зертханасын ұйымдастырған трансұлттық қылмыстық топ сотталды.

Бас прокуратураның баспасөз қызметі хабарлағандай, аталған топ Астана аумағында сату үшін аса ірі көлемде синтетикалық есірткі өндірісін жолға қоймақшы болған.

Трансұлттық қылмыстық топ Украина мен Молдова азаматтарынан құралған.
Оларды ұстау кезінде қылмыс орнынан 10 кило мефедрон мен 17 килодан астам прекурсорлар, сондай-ақ синтетикалық есірткі өндіруге арналған арнайы құрал-жабдықтар табылды.

Қылмыскерлер синтетикалық есірткіні қатаң құпиялылықта жасаған. Үй онлайн режимінде деректерді ұйымдастырушыға жіберетін бейнебақылау жүйесімен жабдықталған Шикізат пен дайын өнімді сақтау үшін гараж жалға алынған.
Қылмыстық іс Ерейментау ауданының прокуратурасымен сотқа жолдану барысында, аталған тұлғалардың әрекеті трансұлттық ұйымдасқан топ ретінде сараланған.

Сотта мемлекеттік айыптаушы сотталушылардың кінәсін толық дәлелдеді.
Ұйымдастырушы 23 жылға, ал сыбайластары 22 жылға мүлкі тәркілене отырып, бас бостандығынан айыру түріндегі жаза тағайындалды.
Үкім заңды күшіне енді.