Сүт қана емес, қант та қымбат

«Сүт қымбаттады» деген хабарды естіген соң, базар аралап шықтық. Алматының «Көкбазарында» үйдің сүті 300 теңгеден (1 литр) сатылып жатыр. Бұрын 250 теңге болған. Ресей мен Белорустан келетін сүт өнімдері де қымбаттапты.

Базар жағалағн жұрт таза сүт түгілі, өңделген сүттің өзіне зәру болып қалғандарын жасырмайды. Айман апа үйінде 15 сиыр ұстайды екен. Сүттің аяқ астынан неге қымбаттап кеткенін сұрадық. «Қазір қыстың ең қысқан шағы. Жем-шөп те удай қымбат. Ал сиыр деген мал жем-шөпке тоймаса сүт бермейді. Асты жылы болмаса да, желіні тартылып кетеді. Сондықтан, бала-шағам аузына қарап отырған сиырларымнан ешнәрсе аямаймын. Сүтті де сондықтан қымбаттаттық» — дейді.
Қарлығаш деген сатушы қызбен аз-кем тілдесіп қалдық. Ол қант бағасының да шарықтап кеткенін айтты. Бұрын әр келісі 175 теңгеден келетін шекер қазір 196 теңгеден келеді екен. Қарлығаш оған 4 теңгеден қосып, бір келісін 200 теңгеден сатып жатыр.

Жарас ШӨКЕ