Шымкенттің автобустары да «Зың-зың»

Шымкентте орындықтары жұмсақ диванға ауыстырылған қоғамдық автобус қатынай бастады, деп хабарлайды ҚазАқпарат.

Енді жолаушылар №60 А бағытында жүретін қалалық автобуста арқаны кеңге салып, барар жеріне жұмсақ әрі жайлы диванға жатып жетеді.

Фейсбукті пайдаланушылардың бірі желіге ерекше автобустың суретін орналастырды. Қала тұрғындары таңданыстарымен қатар, алғыстарын да айтып, жазуда.

Ал Шымкент қаласының әкімдігі жаңаша үлгіде бір ғана автобус жабдықталғанын айтты. Басқа қоғамдық көліктердің орындықтарын жайлы жиһаздарға алмастыру көзделмеген.

«Мұндай автобустың саны біреу ғана. Алдағы уақытта басқа автобустарда мұндай болмайды. Жаңадан келетін автобустарды да өзге жиһазбен жабдықтау жоспарланып отырған жоқ», — деді қала әкімінің баспасөз хатшысы Әйгерім Жұмағұлова.

Еске салайық, жуырда ғана шаһарға жаңадан 70 автобус жеткізіліп, тағы 30 қоғамдық көлік әкелінетіні туралы хабарланған еді.