Шымкент: Ұлттық қолөнер дәріптелді

18 қазан 2024, 11:26

Ұлттық қолөнер – бұл тек кәсіп ғана емес, сонымен қатар халқымыздың тарихы мен мәдениетінің, ұлттық өнерінің айшықты бір бөлігі. Қолөнершілердің әрбір туындысы, әрбір әшекей бұйымдары ұлтымыздың салт-дәстүрлерін, дүниетанымын және өмір сүру мәдениетін көрсетеді. Осы орайда, Шымкент қаласының Көрме орталығында «Халық мұрасы – халық қазынасы» атты көрме-жәрмеңкесі ұйымдастырылды, деп мәлімдеді Шымкент қаласының мәдениет, тілдерді дамыту және архивтер басқармасының баспасөз қызметі.
Бұл шараның негізгі мақсаты – ұлттық қолөнерді дәріптеп, халықпен етене жақын таныстыру, қолөнершілерге өз өнімдерін тікелей тұтынушыға ұсынуға мүмкіндік беру, сондай-ақ өскелең ұрпаққа ұлттық мәдениет пен өнерді насихаттау.
Қолөнер – халқымыздың ежелден келе жатқан бай мұрасы. Бұл өнер ата-бабамыздан мирас болып қалған және қазіргі уақытта заман талабына сай дамып келеді. Бүгінде қолөнер көптеген адамдар үшін бос уақытты өткізудің жолы ғана емес, табыс көзіне айналған. Осыны ескере отырып, жыл сайын дәстүрлі түрде қолөнер шеберлерін қолдау мақсатында ұйымдастырылатын бұл көрме үлкен маңызға ие.

Іс-шараның ашылуында Көрме орталығының директоры Зухра Әмзеқызы қолөнер жәрмеңкесіне деген қызығушылықтың артып келе жатқанын атап өтті. Шара барысында келушілерге теріден, ағаштан, қыштан, киізден, темірден жасалған бұйымдар, зергерлік әшекейлер, ұлттық нақыштағы киімдер мен үй жабдықтары кең ассортиментте ұсынылды.
«Көрменің басты мақсаты – қолөнер шеберлерін халыққа таныстыру, оларға тұтынушыларымен тікелей байланыс орнату, сондай-ақ, ұлттық қолөнерді жастар арасында кеңінен насихаттау. Бұл аталмыш іс-шара биыл қаламызда 8-ші рет өткізіліп отыр. Көрмеде ағаштан, былғарыдан және басқа да материалдардан жасалған қолөнер бұйымдары ұсынылып, ұлттық киімдер мен әшекейлер көпшілік назарын аударады. Бүгінгі таңда қолөнер шеберлері өз кәсіптерін дөңгелетіп, жоғары сапалы, ерекше бұйымдар жасау арқылы халықтың сұранысын қамтамасыз етіп отыр»,-деді Зухра Әмзеқызы.
Көрме барысында концерттік бағдарлама ұйымдастырылып, «Шымкент концерт» концерттік ұйымының әншілері мен «Яссы» би ансамблі өнер көрсетті.
Көрменің көздегені қолөнер шеберлерін халыққа таныстыру, оларға өз тұтынушысымен дидарласып, іскерлік, сауда-саттық қарым-қатынас жасауға ашық алаң туғызу, сондай-ақ өскелең ұрпаққа ұлттық қолөнерді дәріптеу, насихаттау болып табылады.