Семейде шырша безендірген мұғалім биіктен құлады: Министр пікір білдірді

Сурет:Depositphotos.com

Семейде мектеп мұғалімі қаланың орталық алаңында шыршаны безендіріп жатып, биіктен құлап кетті, деп хабарлайды jasqazaq.kz.

Осы оқиғаға қатысты оқу-ағарту министрі Ғани Бейсембаев Facebook парақшасында пікір білдірді.

Министр: «Семей қаласында мұғалімдерді жаңа жылдық шыршаны безендіруге тарту және әріптесіміздің осы іс барысында жарақат алуы — заң бұзушылықтың айқын көрінісі. Педагогтерді кәсіби міндеттеріне жатпайтын мұндай жұмыстарға тарту — «Педагог мәртебесі туралы» заңды өрескел бұзу деп санаймын. Бұл оқиғаға байланысты облыс басшылығы әділ әрі жан-жақты тексеру жүргізіп, алдағы уақытта мұндай келеңсіздіктердің қайталануына жол бермеу үшін тиісті шаралар қабылдайды деп үміттенемін.
Мемлекет басшысы педагогтердің қоғамдағы рөліне ерекше мән беріп, олардың құқықтарының «Педагог мәртебесі туралы» заң аясында қатаң сақталуын әрдайым назарда ұстап келеді. Осы орайда білім басқармалары мен бөлім басшыларына заң талаптарын қатаң орындауға ерекше назар аударуды ескертемін. Қуат Айтқалиевтің отбасына шынайы қолдау білдіре отырып, оның тезірек сауығуын тілеймін. Қазіргі уақытта оған барлық қажетті медициналық көмек көрсетіліп жатыр. Бұл жағдай ерекше бақылауға алынды», — деп жазды.

JQ-Aqparat