Самұрық-Қазына басшыларының саны екі есе қысқарды

“Самұрық-Қазына” Ұлттық әл-ауқат Қорында”АҚ басқарушы директорлар, департаменттер мен құрылымдық бөлімшелердің саны азайды. Бұл туралы қордың баспасөз қызметі хабарлады.

Жаңа құрылымға сәйкес, басқарушы директорлар саны 10-нан 5-ке дейін, департаменттер мен құрылымдық бөлімшелер саны 37-ден 27-ге дейін қысқартылды және басқарма төрағасының орынбасары қызметіне бір штаттық бірлігі енгізілді.

Өзгеріс мақсаты – басқарудың оңтайлылығы (мобильділігін) мен тиімділігін арттыру. Міндет – “Самұрық-Қазына” қорының трансформациясы процесіне терең үңілу, активтерді басқаруда сатылы құрылым енгізу және қор құрамына кіретін ұлттық компаниялардың экономикалық тиімділігін арттыру.

Жаңа құрылым биыл 11 қаңтардан бастап қызмет етеді.

Айта кетейік, «Самұрық-Қазына» ұлттық әл-ауқат қоры» Акционерлік Қоғамы – әртүрлі саладағы мемлекеттік активтерді (меншікті) басқаратын холдинг. Холдингтің негізгі құрылтайшысы және иесі Қазақстан Республикасының Үкіметі. «Самұрық-Қазына» АҚ компаниялар тобына мұнай-газ және көлік-логистика секторларының, химия және атом өнеркәсіптерінің, тау-кен кешендерінің, энергетика, машина құрастыру және жылжымайтын мүлік салаларының кәсіпорындары кіреді.