Самал Еслямова: Қазақ қызымын ашық-шашық киінуді ұнатпаймын

Режиссер Сергей Дворцевойдың «Айка» фильмінде басты рөлді сомдап, 71-ші Канн фестивалінде «ең үздік әйел рөлі» номинациясын иеленген Самал Еслямова өзінің қазақ тіліне деген сүйіспеншілігі туралы айта келе, ашық-шашық кадрлерге түсуге қатысты өз пікірін білдірді.

NUR.KZ. хабарлағандай, «Еліме, халқыма ризашылығымды білдіремін. Бірнеше күннен бері толассыз құттықтаулар түсіп жатыр. Халқымның ықыласын сезіп жатырмын, мың да бір рахмет, — деп сөз бастаған Самал Еслямова Астанада өз өмірі және кино жайлы журналисттерге қысқаша айтып берді.
«Мен өзім Солтүстік Қазақстан облысы, қазіргі Аққайың ауданындағы Аралағаш ауылында тудым. 11 жыл бойы қазақ мектебінде білім алдым. Анам орыс тілді болғандықтан, мені орыс мектебіне бергісі келді. Бірақ мен алты жаста болсам да, қазақ мектебіне барамын деп бой бермедім. Әкем «өзім көмектесемін, қазақ мектебіне бара берсін» деді. Мектепті тәмамдаған соң Петропавлдағы өнер колледжіне оқуға түстім. Оқып жүріп, қазақ театрында қосымша жұмыс істедім», — деді актриса.
Самалдың айтуынша, ол қазақ қызы болғандықтан, ашық-шашық киінуді талап ететін фильмдерді ұнатпайды.
«Развод Надера и Симин» атты ирандық фильм қатты ұнайды. Менің де әр рөлін сүйіп тамашалайтын сүйікті актерлерім бар.
Әрине, мен қазақ қызымын. Өзім де ашық-шашық киініп жүретін фильмдерді ұнатпаймын. Алайда егер фильмнің шынайы шыққанын қаласаң, образды алып шығу керек болса, шектен шықпай ойнап шығуың керек», — деп жауап берді актриса.