Петропавлда оқушыларды сабақ үстінде сылақ басып қалған

Петропавлда сабақ үстінде сылақ басып қалған оқушылар ауруханада жатыр. КТК телеарнасы хабарлағандай, оқыс жағдай осыдан төрт жыл бұрын ғана салынған жаңа мектепте болған. Петропавл білім бөлімінің басшысы Динара Рақышева бұл кезде оқушылардың математика сабағында отырғанын айтады. Зардап шеккен үш бала бірден жедел жәрдеммен облыстық балалар ауруханасына жеткізіліпті.
«Ата аналарына айтылды. Олармен үнемі байланыстамыз, қолдан келген көмекті беріп жатырмыз», — деді. Оқыс жағдай «Жас өркен» ауданында ашылған орта білім беретін № 6 мектепте болған. Төбенің сылағы сыныпта артқы партада, терезе жақта отырған балалардың басына түскен.
Енді бұл оқиғаның себебін құрамында Төтенше жағдайлар департаменті, құрылыс саласының мамандары және ата-аналардан құралған комиссия анықтайды. Сылақ құлаған оқушыларға алғашында «миы шайқалды» деген диагноз қойылған. Үшеуі де ауруханада. Дәрігерлер олардың жағдайы жақсы екенін жеткізді.

JQ-Aqparat
Сурет: ktk.kz