Перизат Қайратқа Палестина тұрғындарына жиналған 200 миллион теңгені жымқырды деген айып тағылды

Қаржы мониторингі агенттігі (ҚМА) еріктілер қозғалысының белсендісі Перизат Қайратқа қатысты тергеу фактісі бойынша заңсыз әрекетінің тағы бір эпизоды анықталғанын хабарлады.

Агенттік хабарлауынша, 2023 жылдың қараша айында Перизат Қайрат Палестина тұрғындарына гуманитарлық көмек көрсету үшін қаражат жинауды ұйымдастырды.

“2023 жылғы желтоқсанда осы ақша есебінен Перизат Қ. «Sensata Plaza» элиталық кешенінен 49 млн теңгеге үш бөлмелі пәтер және 30 млн теңгеге «Mercedes-Benz EQE 500 4 Matic» жаңа автокөлігін сатып алды. Сонымен қатар, қаражаттың бір бөлігі БАӘ-де «Rolex», «Prada» және «Fendi» брендтік бутиктерінен зергерлік бұйымдарды, сағаттар мен киімдерді сатып алуға жұмсалды”,- делінген хабарламада.

Бұл эпизод бойынша Перизат Қ. 200 млн теңгеден аса қаражатты жымқырды деп күдіктелуде. Тергеу жалғасуда.

Егер сіз Перизат Қайраттың алаяқтық әрекеттерінің құрбаны болсаңыз, Астана қ., Бейбітшілік көшесі, 10 мекен-жайы бойынша немесе +7 (7172) 70-84-78 телефон нөмірі бойынша Қаржылық мониторинг агенттігіне хабарласуыңызды сұраймыз.

JQ-Aqparat

Сурет: instagram.com/01pk/