Ақыл-есі кем: Павлодарда сыныптасы мен мұғалімді пышақпен жаралаған бозбала түрмеде отырмайтын болды

30 қыркүйекте Павлодар облысы қылмыстық істер жөніндегі мамандандырылған ауданаралық соты мектепте сыныптасы мен мұғалімді жаралаған жасөспірімге қатысты қылмыстық істі қарады.

Павлодар облыстық соты хабарлағандай, бұл іс бойынша амбулаторлық және стационарлық сот-психиатриялық сараптамаларын өткізу арқылы жасөспірімнің есі дұрыс емес жағдайда қылмыс жасағаны анықталды. Осыған байланысты прокурор мен жәбірленушілер сотталушының психикалық ауруға шалдығуына байланысты медициналық сипаттағы мәжбүрлеу шараларын қолдануды сұраған.

«Ж.-ның психикалық ауруының болуына байланысты, өз іс-әрекетінің іс жүзіндегі сипаты мен қоғамға қауіптілігін ұғына алмағандықтан және оларға ие бола алмағандықтан сот Ж.-ға жалпы психиатриялық стационарда мәжбүрлеп емдеу түріндегі медициналық сипаттағы шараларды тағайындады. Қаулы заңды күшіне енген жоқ», — делінген соттың хабарламасында.

Айта кетейік, мамыр айында Павлодарда 17 жастағы бала мектепке өзімен бірге пышақ әкеліп, сыныптасы мен мұғалімді жаралаған болатын.

JQ-Aqparat