Мемлекеттiк қызметкерде «корочка» болмайды

Мемлекеттiк қызметшi құжатын заманауи бейдж алмастырады. Бастапқыда аталған жұмыс пилот түрiнде жүзеге аспақ. Бұл жайлы ҚР Мемлекеттiк қызмет iстерi және сыбайлас жемқорлыққа қарсы iс-қимыл агенттiгiнiң төрағасы Алик Шпекбаев айтты, деп хабарлайды Baq.kz.

«Бiз кiтапша түрiндегi құжаттан бас тартпақпыз. Себебi, олар қажеттi-қажетсiз жағдайларда қолданыла бередi, әрi олар ескiрген. Кiтапшалар бiрнеше функциясы бар заманауи ID карталарға алмастырылады. Бұл ұсыныс бұрыннан жасалған. Президент әкiмшiлiгi де ұсынған, бiрақ дайын болмағандықтан кейiнге шегерiлген. Менiң ойымша, бiз қазiр осы бейдждерге көше аламыз. Көпшiлiгiңiз шетелде болып тұрасыздар. Ол жақтарда жеке куәлiктер керек емес. Олар ресми бейдж пайдаланады. Бейджде фотосуреттер мен жеке мәлiметтер орналасады. Бiз осыны өз агенттiгiмiзде пилоттық режимде сынаймыз. Одан кейiн барлық мемлекеттiк, орталық және жергiлiктi органдарға таратып көремiз», — дедi Шпекбаев кеңейтiлген алқа мәжiлiсiнде.

Атап өтсек, бүгiн агенттiк төрағасы мемлекеттiк қызметшiлер e-gov сервисiн белсендi пайдалану керек деген болатын.