Астаналық бір топ адам алаяқтардың құрбаны болды. Көпшілігі «Көлік ұтып алдыңыз!» деген қоңырауға алданған. Бұл туралы Астана қаласы Полиция департаменті мәлімдеді, — деп хабарлайды JQ-Aqparat.
Интерент- дүкеннің тұтынушылар базасына қол жеткізген екі азамат тұтынушыларға қоңырау соғып, автокөлік ұтып алғандарын айтқан. Жүлдені алу мен тіркеу, кедендік рәсімдерге ақша аударуды сұраған.
Астана қаласы Сарыарқа ауданы Полиция басқармасының криминалдық полиция бөлімінің қызметкерлері 23 пен 24 жастағы екі қаскүнемді анықтады. Жауапты бөлімнің мәліметінше, зардап шеккендер 500 мың теңгеден 14 миллион теңгеге дейін қаражат жіберген. Қазіргі уақытта алаяқтар қамауда отыр. Астана қаласының полиция департаменті азаматтарға алаяқтардың құрбаны болмас үшін сақ болуды және ақша жөнелту кезінде қырағы болуды ескертеді.