Қостанай тұрғыны танысын тірідей көміпті

Қостанай облысының қылмыстық істер жөніндегі сотында танысын тірідей көмген 28 жастағы облыс тұрғынына қатысты іс қаралады. Бұл туралы ҚазАқпарат  облыстық соттың баспасөз қызметіне сілтеме жасап хабарлайды.

Іс материалдарында көрсетілгендей, Рудный қаласының екі тұрғыны өндіріс орнында ішімдік ішіп, өзара келіспей қалған. Сәлден соң бірі екіншісін ұрып-соққан. Күдікті бірнеше уақыттан кейін қолына темір алып, жерде жатқан досының кеудесіне 4 соққы жұмсады. «Күдікті еденде қансырап жатқан танысын көріп, оны өлтірдім деп ойлайды. Қылмысын жасыру үшін жәбірленушіні жүк көлігінің шөмішіне салып, Горняцкий ауылының шетіне апарып көміп тастаған. Сараптама қорытындысы бойынша, жәбірленуші соққыдан емес, үсіктен көз жұмған», — делінген облыстық соттың хабарламасында. Күдіктіге ҚР ҚК 99 бабы («Кісі өлтіру») бойынша айып тағылды.