Қарақшылар зейнеткерді тонап кетті

10 мамыр 2018, 18:30

Риддер қаласында қарақшылар зейнеткерді скотчпен байлап, үй ішінде тұрған алтындарын ұрлап кетті.

ШҚО ІІД баспасөз қызметінің мәліметінше, 5 мамырға қараған түні зейнеткер ауласында әлдекімнің жүргенін байқап қалады. Ол аулаға шыққанда екі ер адамды көреді. Шақырылмаған қонақтар зейнеткерден су сұрайды. Үйдің иесі су бермек болған кезде қарақшылар оны үйге сүйреп кіргізіп, скотчпен байлап тастайды.

Зейнеткердің шарасыз күйін пайдаланған олар үй ішінен жарты миллион теңгенің алтынын жымқырып кетеді.

«Полиция қызметкерлері жедел түрде екі күдіктіні ұстады. Олар 32 жастағы жергілікті тұрғындар. Бұрын бірнеше мәрте істі болған», — делінген ІІД баспасөз хабарламасында.

«Қарақшылық» бабы бойынша сотқа дейінгі тергеу амалдары басталды.

baq.kz