Қанат Бозымбаев өзінің орынбасарының ұсталуына қатысты пікір білдірді

ҚР Энергетика министрі Қанат Бозымбаев қарамағындағы вице-министр Бақытжан Жақсалиевтің үй қамауға алынуы туралы пікір білдірді.
Stan.kz хабарлағандай, «Өз тарапымнан өкініш білдіргім келеді және әлі де қандай да бір түсінбестік орын алды деп үміттенемін. Себебі біз, ұжым, министрлік, және тұтастай еліміздің энергетикасы Бақытжан Мұхамбетқалиұлын білікті және кәсіби энергетик маманы, әріптес ретінде біледі. Және бұл істің тергеу жұмыстары министрліктің ағымдағы жұмысына, ондағы біздің міндеттемелерімізді орындауға әсер етпейді деп үміттенемін»,- деді Қанат Бозымбаев.
Сонымен қатар, Қанат Бозымбаев Бақытжан Жақсалиев айыпталып жатқан іс Щучинск-Бурабай аймағының көлдерін тазартумен байланысты деп атап өтті. Ал мердігер ұйыммен келісімшарт 2013 жылы қоршаған ортаны қорғау бойынша өзге ведомствода бекітіліп, жылдар бойы жалғасып келген екен.

«Менің түсінуімше, күдік тудырған эпизод 2015 жылға қатысты. Естеріңізге сала кетейін, ол кезде мен мүлдем басқа жерде жұмыс істеп жүрдім. Сондықтан осы эпизод туралы ешқандай түсініктеме бере алмаймын. Сонымен қатар, құжаттар Ұлттық Бюро тарапынан алынып, тергеу жүргізілуде», – деді министр.

Естеріңізге сала кетейік, кеше ҚР Энергетика вице-министрі Бақытжан Жақсалиев Бурабайдағы көлді тазарту жұмыстары кезінде жемқорлық жасады деген күдікпен, үй қамағына алынған болатын.