Ішкі істер министрлігі елдегі құқықтық тәртіп пен қауіпсіздікті қамтамасыз ету бойынша қарқынды жұмыс жүргізуді жалғастыруда, деп хабарлайды jasqazaq.kz.
Бүгінде полиция қызметкерлерінің де, азаматтардың да әрекеттері бейнебақылау камералары, регистраторлар мен смартжетондар арқылы жазылады. Барлық мәлімет министрліктің Өзіндік қауіпсіздік департаментімен тұрақты түрде қадағаланады.
Polisia.kz жазғандай, соған қарамастан, кейбіреулер тарапынан лауазымды тұлғаларға пара беруге әрекеттену жағдайлары әлі де кездеседі. Күшейтілген бақылау басталғаннан бері осындай әрекеттер туралы полиция қызметкерлерінен 900-ден астам хабарлама түсті. Пара беру фактілері бойынша 70-тен астам қылмыстық іс қозғалды.
Мәселен, Астана қаласында бір азамат жауапкершіліктен құтылу үшін ақшаны қызмет көлігінде қалдырған. Құқық бұзушы қылмыстық жауапкершілікке тартылды.
Көкшетау қаласында ер азамат қылмыстық жауаптылықтан жалтару үшін полиция қызметкерлеріне 500 мың теңге ұсынған. Іс сотқа жіберілді.
Ішкі істер министрлігі ел тұрғындарын заңды сақтауға, әкімшілік немесе қылмыстық жауапкершілікке әкеп соғатын әрекеттерді жасамауға шақырады.
JQ-Aqparat
Фото: gov.kz
WhatsApp: +7 705 717 9113
