Ер адам өз үйінде жанып кетті

Жарма ауданында тұтанған өрт салдарынан 1954 жылғы ер адам қайтыс болды, деп хабарлайды ҚазАқпарат. Облыстық төтенше жағдайлар департаментінің баспасөз қызметінің хабарлауынша, өрт кеше түнде шыққан.

Салдарынан Қалбатау ауылының Ақтамберді жырау көшесіндегі жер үйден ер адамның күйік шалған мүрдесі табылған. «Төтенше оқиға туралы марқұмның көршілері хабарлаған. Өрт сөндірушілер жеткенде үйдің екі бөлмесі түгелдей жанып кетті. Асханадан газ баллонын байқаған төтеншеліктер жарылыстың алдын алып, оны қауіпсіз жерге шығарып үлгерді. Оқиға орнынан ер адамның күйік шалған мүрдесін табылды», — делінген департамент таратқан хабарламада. Қызыл жалын 35 шаршы метр аумақты қамтыған. Қайғылы оқиғаға үй иесінің мас күйде шылым шеуі түрткі болуы мүмкін деген болжам бар. Өрт сөндіруге 15 адам мен 3 арнайы техника қатысқан.