Димаш Құдайберген туралы сұрақтар Қытайда тест тапсырмаларына енгізілді

Қытайдың оқу мекемелеріндегі ағылшын тілі бойынша тесттік тапсырмаларға Димаш Құдайберген туралы сұрақтар енгізілді, деп хабарлайды ҚазАқпарат әлеуметтік желідегі ақпаратқа сілтеме жасап.

Аталған тест сұрағын қытайлық блогер Си Хуай Шың (C-huaii槐笙) Вейбодағы жеке парақшасында жариялады. Тапсырмада ағылшын тілінде танымал әнші Димашқа қатысты сұрақтар беріледі. Әншінің туған жері, балалық шағы, хоббиі, алғашқы жетістіктері оның ішінде «Славян базары» және «I am a singer» жобаларында қалай жетістікке жеткені айтылады. «Оның дауысы әдемі, түр-сымбаты да келісті, сондықтан ол Қытайда үлкен танымалдыққа ие болды. Француз тілінде орындаған әнінен кейін Димаштың Weibo (Қытайдағы Фейсбуктің баламасы — авт.) желісіндегі оқырмандары 300 000 адамға жетті», — деп жазады әлеуметтік желі қолданушысы.