Астанада бопса жасаған 5 күдікті ұсталды

Астана тұрғынынан ірі сомадағы ақша бопсалаған бес күдікті ұсталды, деп хабарлайды ҚазАқпарат тілшісі қалалық ІІД баспасөз қызметіне сілтеме жасап.

Полицейлер Солтүстік Қазақстан облысының бес тұрғынын (төрт еркек пен бір бойжеткен) ұстады. ІІД ақпараты бойынша, әр қайсысы өз рөлін бөліп алған. Бойжеткен зардап шегуші рөлін сомдаса, басқа күдіктілер өздерін оның туысқаны немесе құқық қорғау органдарының қызметкерлері ретінде таныстырған. Ұсталушылар бопсалау арқылы зардап шегушілерден ірі сомада ақша алып отырған. Олар «құқық бұзушылық» үшін қылмыстық жауапкершіліктен құтылуға ұсыныс білдірген. Сотқа дейінгі тергеу аясында күдіктілердің қандай қылмыс жасағаны мәлім етілген жоқ. Қазіргі таңда ҚР ҚК 194-бабы «бопсалау» бойынша сотқа дейінгі тергеу жұмыстары жүргізіліп жатыр. «Біз бұл ақпаратты жұртшылықтың күдіктілердің суретін көрулері үшін тараттық. Мүмкін, тағы да зардап шеккендер бар шығар. Күдіктілер қамауға алынды, қазір тергеу изоляторында отыр», — деп түсіндірді ІІД баспасөз қызметінен. Полиция зардап шегушілерден мына телефондарға хабарласуын сұрайды: 71-60-31, 71-60-10, 71-60-37, 71-60-55, 8-700-555-10-86.