Арақ үшін көршісін өлтірген

Қостанай облысында 28 жастағы жігіт көрші әжейді спирттік ішімдік бермегені үшін өлтіріп, артынша үйін өртеп жіберді деп хабарлайды kstnews.kz сайтына сілтеме жасаған NUR.KZ.

2018 жылдың 1-қаңтарына қараған түні Қостанай облысы Әулиекөл аудандық кезекші бөлімшесіне Аманқарағай ауылы Мира көшесінде үй өртеніп жатқаны туралы хабарлама келіп түскен.

Төтенше жағдай қызметкерлері өртті сөндіріп болған соң полиция үйдің ішінен 76 жастағы әйелдің өлі денесін тапқан. Жедел іздестіру шаралары барысында әжейді азаптап өлтірді деген күдікпен 28 жастағы көрші жігіт ұсталды.

Белгілі болғандай күдікті жаңа жыл түні сағат екілер шамасында көршісінің үйіне барып спирттік ішімдік беруін сұраған. Әжей қалағанын бере қоймаған соң көзі қарауытқан азамат оны буындырып тастайды. Қылмыскер зейнеткердің үйінен «Samsung galaxy Grand neo», «Samsung galaxy J1» маркалы екі ұялы телефонды да ұрлайды. Осыдан кейін қылмысының артын жабу үшін үйді өртеп, өзі қашып кеткен.