Алматыда жылу құбыры жарылды

Бүгін Алматыда Қазыбек би мен Қалдаяқов көшелерінің қиылысында жылу құбыры жарылды. 10 метр биіктікке атқылаған ыстық судың салдарынан екі жеңіл автокөлік зақымдалды.

Алматы жылуэнерго кешені және тұрғын коммуналдық шаруашылығы кәсіпорнының ресми өкілі Ян Гириннің мәлімдеуінше, құбыр жарылысы бүгін түстен кейін шамамен сағат 15:20-да, құбырларды гидравликалық сынақтан өткізу жұмысы барысында орын алған.

Артынша, оқиға орнына апаттық бригада келіп жетіп, аумақта қоршауға алды. Құбыр жарылысы салдарынан зардап шеккендер жоқ. Бірақ, алдын ала деректер бойынша екі жеңіл автокөлік зақымдалған. Олардың иелері енді тиісті арыз жазып, сақтандыру компаниялары арқылы өтемақы ала алады.

Айта кетелік, жарылған құбырдың диаметрі — 500 мм. Ал ыстық судың температурасы — 40-45 градус болған. Яғни, анау айтқандай қауіпті болмаған. Құбырдың іске қосылғанына 23 жыл болған.

Қазіргі сәтте оқиға орнында қалпына келтіру жұмыстары жүргізіліп жатыр.

ҚазАқпарат