Алматыда автобусқа соғысқан Mersedes жүргізушісі ес-түссіз жатыр

Алматыда автобус пен Mersedes көлігінің соқтығысуынан зардап шеккен адамдардың жағдайы туралы дəрігерлер айтып берді.

Дəрігерлердің айтуынша, апат болған жерден 4 адам 7-ші қалалық ауруханаға жеткізілген. «Таңғы 9-дан бастап зардап шеккендер толық қабылдау бөлімшесінде ем шараларынан өтті. Үш адам амбулаториялық емге жолдама алды. Олар жеңіл жарақатпен түскен. Ал Mersedes жүргізушісі ауыр жағдайда ес-түссіз жатқан күйінде жеткізілді. Мидың ашық жарақаты, кеуде қуысының ауыр жарақатымен түсті. Келе салысымен оған ота жасалды. Ішіне кеткен қан тоқтатылды. Қазіргі жағдайы ауыр деп бағаланып отыр. Пациент жансақтау бөлімінде жасанды тыныс алу аппаратында жатыр»,- деді 7 аурухананың қабылдау бөлімінің меңгерушісі Ғазиз Төлепбергенов. Қалалық денсаулық сақтау басқармасының баспасөз қызметі хабарлағандай, оқиға орнына 6 жедел жəрдем бригадасы шыққан. «Сонымен қатар, орталық ауруханаға екі адам түсті. Аурухана дəрігерлері пациенттерді тексеріп, оларды амбулаториялық ем қабылдауға үйіне қайтарды. Сонымен қатар, Перинаталогия жəне балалар кардиохирургиясы орталығына жеткізілген жүкті келіншек те ауруханаға жатудан бас тартты»,- деді баспасөз қызметінен. Айта кету керек, оқыс оқиға бүгін Абай Саин көшесінде болған еді. Нөмірі 38-ші автобус пен Mersedes көлігінің соқтығысуынан 10 адам зардап шеккен.

ҚазАқпарат